სოფლის მაშენებლები
ძაღლი და მამალი დაძმობილდნენ. თქვეს:
– სოფელი ავაშენოთო!
ძაღლმა ჰკითხა:
– როგორ ავაშენოთო?
მამალმა უთხრა:
– შენ იყეფე, მე ვიყივლებ და აშენდებაო.
წავიდნენ ტყეში. ძაღლმა ყეფა დაიწყო და დაეძინა. მამალი ხეზე იჯდა და ყიოდა.
მელას ხმა მოესმა, მივიდა, მამალს ჰკითხა:
– მანდ რას აკეთებო?
მამალმა უთხრა:
– სოფელს ვაშენებო!
მელამ სთხოვა:
– ჩამოდი, სახლის ადგილი მაჩვენეო!
მამალმა უპასუხა: – უფროსი მანდ წევს, ეგ გაჩვენებსო.
მელია ძაღლთან მივიდა და დაუძახა:
– ადექი, სახლის ადგილი მაჩვენეო!
ძაღლი გამოეკიდა მელას და მაგრად ცემა.
ნაცემი მელა წავიდა, გორაზე დადგა და დაუძახა:
– მე ხომ ასე დამემართა და თუ თქვენ ეგრე სოფელს ააშენებთ, ვნახავთო!